Müşahidəçinin döyüldüyü bildirilir
76 saylı Lənkəran-Astara seçki dairəsinin 30 saylı məntəqəsində deputatlığa namizəd Xalid Bağırovun səs hüquqlu məşvərətçi və müşahidəçisi olan şəxsin döyülərək məntəqədən uzaqlaşdırıldığı bildirilir.
Bu barədə AzadlıqRadiosuna X.Bağırovun özü məlumat verib. İddiaya görə, müşahidəçi məntəqə seçki komissiyasının sədrinin təzyiqinə məruz qalıb.
76 saylı Lənkəran-Astara dairə seçki komissiyasının sədri Məzahir Əliyev isə «Turan» agentliyinə bu deyilənləri təkzib edib: «Mənə də bu barədə məlumat verdilər. Araşdırdım, məlumat yalan məlumatdır, şər və böhtandır».
MSK-dan müşahidəçinin döyülməsi ilə bağlı şikayətə münasibət
Mərkəzi Seçki Komissiyası Katibliyinin Media və ictimai əlaqələr şöbəsinin müdiri Şahin Əsədli 76 saylı Lənkəran-Astara seçki dairəsinin 30 saylı məntəqəsində müşahidəçinin döyülməsi haqqında suala cavab verib. O vurğulayıb ki, bu məsələ ilə bağlı iddianı araşdırıb məlumat verəcəklər.
Kəsik bülletenlər
124 saylı Şuşa - Ağdam - Xocalı - Xocavənd seçki dairəsindəki 14 saylı məntəqədə seçki yenicə başladıqda 5 seçicinin səsvermədə iştirak etdiyi açıqlanıb. Amma 40 bülletenin kənarının kəsildiyi bəlli olub.
Komissiya üzvləri bunun səbəbini izah etməyiblər.
Oxşar halın 76 saylı Lənkəran-Astara seçki dairəsinin 11 saylı məntəqəsində də baş verdiyi iddia edilir. Bu barədə müşahidəçilərdən biri bildirib.
«Turan» İnformasiya Agentliyinin əməkdaşı bəzi dairələrin bir sıra məntəqələrində onlarla bülletenin kənarlarının əvvəlcədən kəsilməsi ilə bağlı deyilənlərə Mərkəzi Seçki Komissiyasından (MSK) münasibət almağa çalışıb. MSK-dan bildiriblər ki, bu barədə onlara şikayət daxil olmayıb. Qurumdan qeyd ediblər ki, şikayət olarsa, mütləq araşdırılacaq.
Seçkini izləyə bilmirlər
22 saylı Nəsimi ikinci seçki dairəsinin 23 saylı məntəqəsində müşahidəçilər səsvermə prosesini izləyə bilmədiklərini deyiblər.
29 saylı Səbail seçki dairəsində də müşahidəçilərə problem yaradıldığı bildirilir.
AzadlıqRadiosu Gəncədən də eyniməzmunlu şikayət alıb.
Deyilənlərlə rəsmi münasibət almağa çalışırıq.