Vətəndaşı oyadan seçki qutusu
Saat 10-na seçici fəallığı açıqlanıb
Mərkəzi Seçki Komissiyası (MSK) bu gün, fevralın 9-da keçirilən parlament seçkiləri ilə bağlı səsvermə prosesində saat 10:00-a olan seçici fəallığını açıqlayıb.
MSK Katibliyinin İnformasiya Mərkəzinin müdiri Fərid Orucov bildirib ki, saat 10.00-a qədər respublika üzrə 670 min 86 nəfər səs verib, seçici fəallığı 12.57 faiz olub.
Seçki məntəqələrində generatorlar
Hövsan qəsəbəsində bəzi məntəqələrdə işıqların sönməsinə 30 saylı Suraxanı birinci seçki dairəsindən deputatlığa namizəd Ziya Quliyev də münasibət bildirib. O, AzadlıqRadiosuna deyib ki, bəzi məntəqələrdə artıq 40 dəqiqədən çoxdur işıq yanmır: «Məsələn 19 saylı məntəqədə 40 dəqiqədən çoxdur işıq yanmır. Bayaq bütün məntəqələrdə, hətta dairə seçki komissiyanın özündə belə sönmüşdü. İndi bəzi məntəqələrdə işığın verilməsi bərpa olundu, bəzilərində isə seçki işıqsız keçirilir. Hava şəraitini nəzərə alıb generatorla təmin etməli idilər».
30 saylı Suraxanı birinci seçki dairəsindən də «Turan» agentliyinə bəzi məntəqələrdə işıqların sönməsini təsdiq etdilər. «Bəzi məntəqələrdə generatorun gücü çatmadı, işıqlar söndü, amma seçki prosesi davam edir», - qurumdan qeyd ediblər
Onların vurğulamasına görə, problem tezliklə həll ediləcək.