Məşvərətçi: 'Saçlarımdan tutdu sürüdü, üzümü cırdı'
76 saylı Lənkəran-Astara seçki dairəsində səs hüquqlu məşvərətçi Jalə Bayramovaya fiziki təzyiq göstərildiyi bildirilir.
Bu barədə məlumatı AzadlıqRadiosuna Jalə Bayramova özü verib. Onun sözlərinə görə, seçki prosesi ilə bağlı çəkilişi apararkən döyülüb: «Çəkiliş edirdim, birdən-birə məntəqədə olan hansısa qadın gəldi üstümə, saçlarımdan tutdu sürüdü, üzümü cırdı. Axırda məcbur olub polisə zəng vurdum ki, məni burada öldürürlər. Polisdə hadisə ilə bağlı izahat yazdım».
76 saylı Lənkəran-Astara seçki dairəsi dairə seçki komissiyasından «Turan» agentliyinə bunları deyiblər: «Məşvərətçi icazə almadan seçicinin şəklini çəkib, bu da onun etirazına səbəb olub və onlar dalaşıblar. Bayramova məntəqədən uzaqlaşdırılıb».
Lənkəran rayon Polis Şöbəsindən sözügedən dairədə insident baş verdiyini təsdiqləyiblər.
Xalid Bağırov seçkidən çəkilmək qərarına gəlib
76 saylı Lənkəran-Astara seçki dairəsindən namizəd Xalid Bağırov geri çəkilmək qərarına gəlib. Hüquqşünas AzadlıqRadiosuna bildirib ki, seçki məntəqələrində müşahidəçilərinə qarşı zorakılıqlara görə bu addımı atmaq məcburiyyətində qalıb. X.Bağırovun sözlərinə görə, bir neçə məntəqədə müşahidəçilərə fiziki təzyiq göstərilib: «Jalə Bayramovanı saçından tutub, məntəqə boyu (Şürik kəndində) sürüyüblər, bu dərəcədə biabırçılıqdır. Hazırda polis şöbəsindədir. Mən o gəncləri yem eləmək istəmirəm. Amma gənclər də geri çəkilmək istəmirlər».
76 saylı Lənkəran-Astara seçki dairəsində olanlar haqda ATƏT müşahidəçilərinə məlumat verdiyini deyən X.Bağırov başqa bir narazılığını da dilə gətirib: «Bütün Azərbaycan, beynəlxalq qurumlar bilirdi ki, burada ciddi savaş gedir. Bakıda bir məntəqəyə dörd müşahidəçi yığıldığı halda, burada bunu eləmədilər. Təəssüf ki, tərk edildik...».
Bundan öncə sözügedən dairənin 30 saylı məntəqəsində deputatlığa namizəd X.Bağırovun səs hüquqlu məşvərətçi və müşahidəçisi olan şəxsin döyülərək məntəqədən uzaqlaşdırıldığı xəbəri yayılmışdı. Dairə seçki komissiyasının sədri Məzahir Əliyev isə «Turan» agentliyinə bu deyilənləri təkzib etmişdi: «Mənə də bu barədə məlumat verdilər. Araşdırdım, məlumat yalan məlumatdır, şər və böhtandır».
Ağzıyekə seçki qutusu
Masallıdan gəlib Nərimanovda səs verib
Bəzi seçicilərin MKİS arayişları ilə səs verməsinə aid şikayət 19 saylı Nərimanov birinci seçki dairəsinin 16 saylı məntəqəsində də eşidilib. Həmin dairədən namizəd Vəli Quliyev AzadlıqRadiosuna bildirib ki, «Evrika» Liseyinin bir müəlliməsi dairə ərazisində qeydiyyatı olmadığı halda Mənzil Kommunal İstismar Sahəsinin (MKİS) arayışı ilə səs verməyə qatılıb: «Deyib, işdən göndəriblər. 6 saylı məntəqədə iki nəfər «JEK» (MKİS) arayışı ilə səs verməyə gəlib. Qadının Masallı rayonunda qeydiyyatda olduğuna baxmayaraq. Hələ Ağdam rayonunda qeydiyyatda olan adam da gəlib 19 saylı dairənin 16 saylı məntəqəsində səs verməyə. O da «JEK»dən verilmiş arayışla gəlib».
19 saylı Nərimanov birinci seçki dairəsi dairə seçki komissiyasından «Turan» agentliyinə deyilib ki, belə hal Seçki Məcəlləsinin 47.2-ci maddəsi ilə tənzimlənir: «Yəni, 6 aydan çox bir ərazidə yaşayan adam həmin ərazidə gəlib səs verə bilər. Həmçinin, bu məsələ ilə bağlı MSK sədri Məzahir Pənahov da öz münasibətini bildirib...».