R.E.M. rok-qrupu 1981-ci ildə "Azad Avropa Radiosu" mahnısı ilə özünü təqdim edib. Bu qrup o zaman ABŞ-nin maliyyələşdirdiyi bu radionun azad mətbuatın qadağan olunduğu ölkələrdə demokratiyanın qurulmasındakı rolunu xatırladırdı.
3 may – Dünya Mətbuat Azadlığı Günündə qrup Azad Avropa/Azadlıq Radiolarının qarşıdan gələn 75-ci ildönümü şərəfinə bu mahnının xüsusi yeni versiyasını təqdim edib. Bu arada ABŞ-nin maliyyələşdirdiyi bir sıra media qurumları maliyyənin kəsilməsinə qarşı məhkəmə iddiaları qaldırıblar. Bir çoxları Donald Tramp administrasiyasının ABŞ Qlobal Media Agentliyində (USAGM) böyük ixtisarlarla bağlı fərmanını demokratiyayönlü medianı susdurmaq cəhdi kimi görür.
"İstər musiqi olsun, istər azad mətbuat – senzura hər yerdə həqiqətə təhdiddir. Dünya Mətbuat Azadlığı Günündə Azad Avropa Radiosunun cəsur jurnalistlərinə təşəkkür edirəm", – qrupun əsas ifaçısı və təsisçi üzvü Maykl Stayp deyib.
AzadlıqRadiosu ətrafında baş verənlər
USAGM-ə AzadlıqRadiosu, "Amerikanın Səsi", Azad Asiya Radiosu, Kuba Yayımı Ofisi (Radio Marti), Yaxın Şərq Yayım Şəbəkələri (MBN) və Açıq Texnologiya Fondu (OTF) daxildir. Bu agentlik 50 dildə informasiya yayımına nəzarət edir. Hər həftə bu informasiya 361 milyon izləyiciyə ötürülür.
Tramp martın 14-də yeddi federal agentlik, o cümlədən AzadlıqRadiosu və digər federal yayımçılara nəzarət edən USAGM-də böyük ixtisarlarla bağlı fərman imzalayıb. Fərmanın dərcindən bir neçə saat sonra USAGM-in adından göndərilmiş məktubda Konqresin AzadlıqRadiosuna ayırdığı qrantın kəsildiyi bildirilib.
AzadlıqRadiosu bu addımı qanunsuz sayaraq USAGM-ə qarşı məhkəmə iddiası qaldırıb.
Yanvarda ikinci müddətə prezidentliyə başlayan Tramp birinci prezidentlik dövründə USAGM ilə redaksiya müstəqilliyi, proqramların idarə olunmasına görə toqquşub. O, indiki hakimiyyəti dövründə də eyni məsələləri qaldırıb.
Amma yayımçıların tərəfdarları onları ABŞ diplomatiyasının vacib qanadı sayırlar.
Diktatorları cana gətirən radio
"Mənə görə, R.E.M.-in musiqisi daim azadlığın təntənəsini əks etdirib: ifadə azadlığı, lirika bizi düşünməyə vadar edir, melodiya isə hərəkətə ruhlandırır", – AzadlıqRadiosunun prezidenti Stiven Kapus deyib.
"Bunlar isə Azad Avropa Radiosu jurnalistlərinin məqsədidir – bilgiləndirmək, ruhlandırmaq və izləyicilərimizin çox vaxt əlinin çatmadığı azadlıqları qorumaq. Biz özəlliklə gerçəkdən qorxan şəxslərdən hesabatlılıq tələb edirik. Onlar bizi susdurmaq üçün çox səylər göstərirlər – vebsaytları bloklayırlar, hətta həmkarlarımızı həbs edirlər", – o vurğulayıb.
R.E.M.-in "Azad Avropa Radiosu" mahnısının sözləri dezinformasiya içində gerçək bilgi almaq arzusunun şərhi kimi yozulur. Nikbin musiqisi isə dirəniş və ümid ruhu bəxş edir.
"Azad Avropa Radiosunun jurnalistləri 75 ildir diktatorları boğaza yığıblar. Bilirsiniz ki, düşmən qazanırsızsa, deməli, işinizi görürsünüz", – qrupun təsisçi üzvü Mayk Mils deyib.
Hazırda AzadlıqRadiosunun dörd jurnalisti – İqar Losik, Nika Novak, Vladislav Yesipenko və Fərid Mehralızadə gördükləri işə görə həbsdədir.
R.E.M. bildirib ki, mahnının məhdud sayda, narıncı rəngli vinil plastinkasını buraxır, əldə olunan gəlir də AzadlıqRadiosuna köçürüləcək.
