Saatlı rayonunda ölmüş adamın adına uzun müddət pensiya alınıb. Bunu ört-basdır etməkdən ötrü ölüm tarixi rəsmi şəkildə dəyişdirilib. Xəstə olmasalar da, cürbəcür diaqnozlarla əlil sayılaraq pensiya alanlar da var. Bütün bunlara görə Saatlı rayon Mərkəzi Xəstəxanasının keçmiş direktor müavini və baş həkimi Adəm Əliyev cinayət məsuliyyətinə cəlb edilib. Həbs olunmasa da, ona aylıq qazancından 20 faiz dövlət nəfinə tutulmaqla, 2 il islah işləri cəzası verilib.
A.Əliyev 1987-ci ildən Saatlı rayon Mərkəzi Xəstəxanasında işə başlayıb. Həkim-terapevt vəzifəsindən tutmuş, narkoloq, anestezioloq-reanimatoloqadək müxtəlif vəzifələrdə çalışıb. Sonradan baş həkimin müavini, ardından da baş həkim təyin olunub. Bu vəzifədə çalışanda həm də Həkim Məsləhət Komissiyasının sədri olub. Beləcə, əlillik dərəcəsinin təyin edilməsində əsas söz sahiblərindən birinə çevrilib.
İddiaya görə, elə həmin vəzifədə çalışarkən, A.Əliyev qulluq yetkilərindən sui-istifadə edərək saxtakarlıqlara yol verib. Məsələn, Saatlı sakini Əzizbəyim Əmirovaya sağlam olduğu halda, eşitmədən əziyyət çəkməsi haqda yalan diaqnozla III qrup əlillik təyin olunub. O, 19 fevral 2021-ci il fevralın 19-dan 13 dekabr 2023-cü il dekabrın 13-dək 4 min 292 manat pensiya alıb.
Saxta rəy verilib
A.Əliyevlə bağlı cinayət işində diqqətçəkən olaylardan biri də sağlam şəxsə qan xərçəngindən əziyyət çəkməsi barədə saxta rəy verməsidir. Söhbət Saatlı rayonundakı Əlisoltanlı kəndinin sakini Əzizə Əzizalıyevanın oğlundan gedir. Ə.Əzizalıyeva 2022-ci ilin martında 88 yaşında vəfat etsə də, ölümü 2022-ci ilin dekabrına rəsmiləşdirilib. Arada qalan müddətdə onun pensiyasını (toplam 2 min 567 manatı) oğlu alıb. Övladı deyib ki, xərçəng xəstəliyindən əziyyət çəkdiyindən müalicəsinə pul tapa bilmirmiş. Bu üzdən, artıq ölmüş anasının pensiyasını alıb müalicəsinə xərcləmək qərarına gəlibmiş. Həmin olayla bağlı keçmiş baş həkimə verilən ittihamda iddia edilir ki, Ə.Əzizalıyevanın dekabrda vəfat etməsi haqda tibbi arayış verməkdən ötrü onun oğlu Mehmandan İlqar adlı bir nəfərin vasitəsiylə 800 manat pul alınıb. A.Əliyev bunu yalanlayır, heç kimdən pul almadığını deyir. Ə.Əzizalıyevanın vəfatıyla bağlı araşdırma aparmadan sənəd verməsi, üstəlik, orada ölümün səbəbi kimi "sol mədəcik çatmamazlığı və ya essensial (birincili) hipertenziya" göstərməsini isə belə əsaslandırıb: "Deyilənlərə inandım, ona görə mərhumun yaşayış yerindən arayış, ya da başqa sənəd istəmədim. Şifahi məlumat əsasında ölüm haqqında tibbi şəhadətnamə yazıb Konsultativ poliklinika şöbəsinin möhürüylə təsdiqlədib verdim. Bütün xəstəliklər sol mədəcik çatmamazlığına gətirib çıxarmaqla ölümə səbəb olur. Ona görə ölümün səbəbini belə göstərdim. "Essensial (birincili) hipertenziya" yazmağım isə ona görə olub ki, onu sağlığında həmin xəstəlikdən 25 il müalicə etmişəm".
"Bəzi anketlər sonradan kimlərsə tərəfindən məqsədli şəkildə gizlədilib..."
Xəstəliyi olmayan Saatlı sakinlərinə yalan diaqnozlarla əlillik dərəcələri təyin etdirməsi haqda ittihamlara gəlincə, A.Əliyev vurğulayıb ki, bütün bunlardan xəbərsiz olub. Onun sözlərinə görə, xəstələrin hamısını əyani şəkildə komissiyada görüb.
"Xəstə şəxsən komissiyaya gəlmədən, yaxud şəxsiyyət vəsiqəsindən başqa sənəd, o cümlədən epikriz təqdim etmədən rəsmiləşdirmə aparılması mümkün deyildi. Əgər belə hal olubsa da, mənim məlumatım olmayıb. Elektron əlillik göndərişi icazəsindən kənar baş verib. Tibbi anketlər olmadan "forma 88"lərin rəsmiləşdirilməsi ilə bağlı digər ehtimal budur ki, bəzi anketlər sonradan kimlərsə tərəfindən məqsədli şəkildə gizlədilib, yaxud da məhv edilib", - keçmiş baş həkimin sözləridir.
A.Əliyev Saatlı rayon Mərkəzi Xəstəxanasında can həkimi - terapevt kimi çalışır.
