İsrailin baş naziri Benyamin Netanyahu Azərbaycana planlaşdırılan səfərini regiondakı hadisələr və "sıx siyasi və təhlükəsizlik qrafiki" üzündən təxirə salmalı olub. Bunu Netanyahunun ofisi bildirib. "The Times of Israel" qəzeti isə "Walla" xəbər saytına istinadla yazır ki, əsl səbəb Türkiyənin "Wing of Zion" dövlət şirkətinə öz hava məkanından keçməyə icazə verməməsidir.
Məlumatda deyilir ki, baş nazirin ofisi Bakıya, Yunanıstan və Bolqarıstan üzərindən alternativ uçuş marşrutunu nəzərdən keçirib, amma bu halda uçuş vaxtı iki dəfəyədək uzandığından bundan imtina edib.
"The Times of Israel" yazır ki, birinci dəfə deyil Türkiyə ilə münasibətlər üzündən İsrailin yüksəkrütbəli rəsmilərinin səyahət planları dəyişir.
2024-cü ilin noyabrında prezident İsaak Hersoqun Bakıda BMT-nin COP29 iqlim konfransına səfəri son anda təxirə düşüb, təhlükəsizlik səbəbləri əsas gətirilib. Onda da Türkiyənin öz hava məkanından uçuşa icazə verməməsi haqda məlumatlar yayılmışdı.
İsraildən Azərbaycana uçuş marşrutları, əsasən, Türkiyə üzərindın keçir, alternativ yollar Suriya, İraq və İrandır.
Netanyahunun Bakıya beşgünlük səfər edəcəyi haqda məlumat yayılmışdı.
Baş nazirin ofisi səfərin başqa tarixə keçiriləcəyini də bildirib.
Azərbaycanın İsraillə sıx münasibətləri var. 2020-ci ildə İkinci Qarabağ müharibəsi vaxtı Təl-Əviv Bakıya dəstək verib, əks istiqamətdə isə enerji ixracı artıb.
Bir müddət öncə isə Bakıda İsraillə Türkiyə arasında təmasların olduğu açıqlanıb. Bakı bu iki ölkə arasında potensial vasitəçi statusunu gücləndirib.