Ermənistan parlamentinin spikeri Alen Simonyan ölkənin keçmiş prezidenti Robert Koçaryanı Rusiyanın casusu olmaqda ittiham edib.
"Hesab edirəm ki, Robert Koçaryan Ermənistan Respublikasında rus casusu statusuna malik şəxsdir. O, Rusiyanın maraqlarını güdən və yalnız bu istiqamətdə xidmət göstərən siyasi xadimdir", - Simonyan deyib.
O vurğulayıb ki, bu onun şəxsi fikridir. "Mən onun fəaliyyətini, verdiyi bəyanatları görürəm və bu, mənim siyasi qiymətimdir. Siz Rusiyanın bəyanatları ilə eyni olan bəyanat verəndə, sizin fraksiyanızın üzvləri Rusiya tərəfinin fikirləri ilə üst-üstə düşən çıxışlar edəndə mən belə bir nəticəyə gələ bilərəm. Heç kimə sirr deyil ki, Robert Koçaryan tərəfindən dəstəklənən və onu siyasi lideri hesab edən Gümrü şəhəri meri Ermənistanı Rusiya-Belarus ittifaqının bir hissəsi olaraq gördüyünü açıqlayıb", - Simonyan bildirib.
"Ona Ərdoğanın kitabını verin..."
Ölkənin müxalifət liderlərindən sayılan Koçaryandan Simonyanın ittihamına şəxsən cavab gəlməyib. Amma onun ofisinin rəhbəri Baqrat Mikoyan Simonyanı "Azərbaycan casusu" adlandırıb: "Məncə, Alen Simonyan "Azərbaycan casusu" və "Türkiyə agenti" statusuna sahibdir, onun sözlərinə istinad isə istənilən erməni üçün iyrənclikdir. Ona Ərdoğanın kitabını verin, qoy qucaqlayıb sakitləşsin".
Koçaryan hazırkı Paşinyan hökumətini, xüsusən də onun xarici siyasətini kəskin tənqid edir. O, fevralda keçirdiyi geniş mətbuat konfransında iddia edib ki, Ermənistan rəhbərliyi qlobal geosiyasətdəki mürəkkəblikləri dərk edə bilmir, ölkənin suverenliyini riskə atan qərarlar qəbul edir.
Koçaryan Ermənistanın Rusiyayla gərgin münasibətlərinin 2023-cü ildə ciddi nəticələrə səbəb olduğunu və Moskvanın Azərbaycana Qarabağ üzərindəki nəzarətini dayandırmaq üçün müdaxilə etməsinin mümkünsüz olduğunu irəli sürüb. "Ölkəmizdə çoxları narahatdır və "niyə Rusiya öz öhdəliklərini yerinə yetirmədi" deyə soruşurlar. Gəlin bunu Rusiyanın gözü ilə görməyə çalışaq. Nə gördüyünüzü deyirəm: Qarabağda baş verənləri yalnız hərbi müdaxilə ilə dayandırmaq olardı, başqa heç bir seçim yox idi", - Koçaryan bildirib.
Son zamanlar Koçaryanla yanaşı, digər keçmiş prezident Serj Sarkisyan da fəallaşıb. Sarkisyan ötən həftə deyib ki, hazırkı baş nazir Nikol Paşinyanı hakimiyyətdən uzaqlaşdırmağın vaxtı çatıb və onun rəhbərlik etdiyi Respublika Partiyasının bunu reallaşdırmaq planı var. Ancaq o, bunun necə reallaşacağı barədə təfərrüatlara varmayıb.
Sizin brauzer HTML5-i dəstəkləmir
Paşinyanın göndərilməsinə hazırlıq: Qarabağlı eks-prezidentlər birləşir?