Azərbaycan Xalq Cəbhəsi Partiyası (AXCP) Qaradağ rayon şöbəsinin sədri Zaur Əsgərov və Binəqədi şöbəsinin keçmiş üzvü Gündüz Mirzəyev dövlət əleyhinə çağırışlar ittihamıyla mayın 15-də məhkəmə önünə çıxarılıblar. Bu işə Bakı Ağır Cinayətlər Məhkəməsində Azər Tağıyevin sədrlik etdiyi hakimlər kollegiyası baxır.
Məhkəmədə prokurorun elan etdiyi ittiham aktından aydınlaşıb ki, Z.Əsgərov və G.Mirzəyev sosial şəbəkələrdə, "WhatsApp" kimi ani mesajlaşma sistemində yaradılmış qruplarda yazdıqlarına görə həbs ediliblər. Onlar "Azərbaycan Naminə Birlik", "AXCP-nin dostluq qrupu" adlı qruplarda hakimiyyəti ələ keçirmək, itaətsizlik göstərmək kimi fikirlər yazmaqda, dövlət əleyhinə açıq çağırışlarda suçlanırlar.
"Hakimiyyəti zorla ələ keçirmək söhbəti olmayıb"
Z.Əsgərov bu ittihamla razılaşmır və özünü təqsirli bilmir. AXCP fəalı ittihama münasibət bildirəndə vurğulayıb ki, olsa-olsa, sosial şəbəkələrdəki söhbətlərdə təhqir xarakterli ifadələr işlətdiyinə görə peşmandır və bu səbəbdən üzr istəyir.
Digər təqsirləndirilən G.Mirzəyevlə yaxın münasibəti olmadığını, bir dəfə 10 dəqiqəlik söhbətləşdiklərini deyən cəbhəçinin sözlərinə görə, sosial şəbəkələrdəki qruplarda da yaşayış səviyyəsi, həyat tərzi barədə söhbət ediblər: "Mən bazarda işləyən adam olmuşam. Günümün çoxu da orada keçirdi, heç sosial şəbəkələrə vaxtım olmurdu. Bizim söhbətlərdə dövlət əleyhinə çağırış, hakimiyyəti zorla ələ keçirmək söhbəti olmayıb".
Z.Əsgərov vurğulayıb ki, seçkini hakimiyyət dəyişikliyinin tək yolu sayır.
G.Mirzəyev isə özünü təqsirli bilib, peşman olduğunu dilə gətirib. O vurğulayıb ki, cinayət işində istinad edilən səs yazıları 2020-ci ilə aiddir: "Mən sosial ədalətin bərpasını istəmişəm, lakin terrorçuluğa çağırış etməmişəm. Bəli, gərgin vəziyyətdə müəyyən ifadələr işlətmişəm, buna görə peşmanam. Amma bizim Zaur Əsgərlovla zorla hakimiyyəti ələ keçirmək istiqamətində söhbətimiz olmayıb".
G.Mirzəyev partiyadan istefa verdiyini, bağışlanması üçün prezidentə müraciət etdiyini də sözlərinə əlavə edib.
Məhkəmə prosesi mayın 22-də davam edəcək.
Xatırlatma
G.Mirzəyev və Z.Əsgərov bu il martın 7-də saxlanılıblar. Onlara Cinayət Məcəlləsinin 281.2-ci (dövlət əleyhinə açıq çağırışlar, təkrar və ya bir qrup şəxs tərəfindən törədildikdə) maddəsiylə ittiham verilib. Bu maddədə 5 ildən 8 ilədək həbs cəzası nəzərdə tutulub.
Martın 29-da AXCP G.Mirzəyevin partiya üzvlüyündən çıxarıldığını açıqlayıb.
AXCP-dən bildirilib ki, hazırda partiyanın, azı, 15 nəfər üzvü həbsdədir. Onlar özlərini təqsirli bilmir, siyasi baxışlarına görə sifarişlə həbs olunduqlarını deyirlər.
Hökumət təmsilçiləri isə ölkədə heç kimin siyasi motivlərlə təqib olunmadığını, həbs olunanların konkret faktlara görə saxlandığını bildirirlər.
