Son üç ildən artıq bir müddətdə Rusiya və Ukrayna arasında ilk birbaşa sülh danışıqları tez bitib. Məhbus mübadiləsi üzrə razılaşmadan başqa elə bir proqres baş verməyib. Ukrayna rəsmiləri Rusiyanı "qəbuledilməz" tələblər irəli sürməkdə ittiham edib.
Türkiyə rəsmiləri İstanbuldakı danışıqların başlayandan 90 dəqiqə sonra bitdiyini deyiblər. AFP Ukrayna rəsmisinə istinadla yazıb ki, mayın 16-da əlavə danışıqlar mümkündür, amma "indilik, planlaşdırılmır".
Tərəflər yaxın gələcəkdə hər iki tərəfdən min əsiri dəyişdirməyə razılaşıblar. Bu, Rusiya 2022-ci ilin fevralında Ukraynanın tammiqyaslı işğalına başlayandan ən böyük əsir mübadiləsi ola bilər.
"Reuters" adını çəkmədiyi Ukrayna mənbəyinə istinadla yazır ki, Rusiya nümayəndə heyəti "reallıqdan uzaq" tələblər irəli sürüb.
AFP Ukrayna mənbəsinə istinadla qeyd edir ki, bu tələblərdən biri atəşkəsdən ötrü Ukraynanın qüvvələrini özünə aid böyük ərazilərdən çıxarması olub. Görünür, bu, Rusiyanın qismən işğal etdiyi Donetsk, Luqansk, Zaporojye və Xerson vilayətlərinə aiddir.
Rusiya heyətinin başçısı Vladimir Medinski ölkəsinin ümumilikdə nəticədən məmnun qaldığını söyləyib.
İstanbul danışıqları başa çatıb
Mayın 16-da İstanbulda Rusiya və Ukrayna nümayəndə heyətləri arasında görüş olub.
Ukrayna nümayəndə heyətindəki mənbələr danışıqların bitmədiyini, sadəcə, fasilə verildiyini bildirib. Danışıqların nə vaxt davam edəcəyi barədə məlumat yoxdur.
Nümayəndə heyətləri müzakirələrə başlamazdan əvvəl Türkiyə xarici işlər naziri Hakan Fidan açılış nitqi ilə çıxış edib. Türkiyəli nazirin sözlərinə görə, Rusiya-Ukrayna hərbi münaqişəsinin həllinin hazırkı mərhələsi kritikdir. Fidan tezliklə atəşkəsin razılaşdırılmasının böyük əhəmiyyət kəsb etdiyini vurğulayıb.
Türkiyə XİN rəhbəri xatırladıb ki, bugünkü görüş Moskva ilə Kiyev arasında 2022-ci ilin martından bəri ilk birbaşa təmasdır. Onun sözlərinə görə, danışıqlar Zelenski və Putin arasında gələcək görüşü müəyyən edəcək.
İstanbulda Rusiya ilə danışıqlara başlamazdan əvvəl Ukrayna prezidenti aparatının rəhbəri Andriy Yermak X platformasındakı paylaşımında vurğulayıb ki, "rusların bugünkü görüşü 2022-ci ilə bağlamaq cəhdləri heç bir nəticə verməyəcək".
Türkiyə xarici işlər nazirinin danışıqlar zalını tərk etmədiyi bildirilib. "İnterfaks"ın məlumatına görə, daha əvvəl Rusiya nümayəndələri Ankara təmsilçilərinin salamlama nitqindən sonra iclası tərk etmələrində israr ediblər.
15 may
Rusiya-Ukrayna danışıqları mayın 16-na qaldı
Rusiya və Ukrayna arasında üç ildən artıq müddətdə ilk birbaşa danışıqlar İstanbulda cümə günü, mayın 16-da başlayacaq. Bu barədə mənbələrinə istinadən həm Rusiya, həm də Ukrayna mediası xəbər verir.
Rusiya prezidenti Vladimir Putin danışıqlara mayın 15-də başlamağı təklif edib, Rusiya nümayəndə heyəti həmin gün səhər saatlarında İstanbula gəlib. Bununla belə, Ukrayna prezidenti Volodimir Zelenski Putinin danışıqlarda iştirakına təkid etdiyi üçün görüşün, ümumiyyətlə, baş tutub-tutmayacağı bəlli deyildi. Mayın 15-i axşam Zelenski Ukrayna nümayəndə heyətinin İstanbula gələcəyini açıqlayıb.
İstanbulda Rusiya ilə danışıqlarda Ukrayna nümayəndə heyətinə müdafiə naziri Rustem Umerov başçılıq edəcək.
Zelenski Ankaradadır. Rusiya-Ukrayna görüşü gecikir
Rusiya və Ukrayna nümayəndə heyətləri arasında mayın 15-də İstanbulda keçiriləcək danışıqlar günün ikinci yarısına qədər təxirə salınıb. Rusiya Xarici İşlər Nazirliyi bildirib ki, bu qərar "Türkiyənin təşəbbüsü ilə" qəbul edilib.
Eyni zamanda, Ukrayna prezidenti Volodimir Zelenski türkiyəli həmkarı Rəcəb Tayyib Ərdoğanla danışıqlar aparmaq üçün Ankaraya gəlib.
Zelenski Ankarada hava limanında jurnalistlərə açıqlamasında bildirib ki, Rusiya ilə danışıqların formatı və atılacaq addımlar ilə bağlı qərarlar Ərdoğanla görüşündən sonra veriləcək: "Rəsmi olaraq Rusiyanın təmsilçilik səviyyəsindən xəbərsizəm. Amma gördüklərimizə əsasən, onlar, sadəcə, yer tutmaq üçün göndərilmiş fiqurlara bənzəyirlər".
Zelenski əlavə edib ki, Ukrayna Rusiya ilə danışıqlarla bağlı ABŞ nümayəndə heyəti ilə əlaqə saxlayır.
14 may
Putin İstanbula getmir
Mayın 15-də İstanbulda Ukrayna ilə danışıqlarda Rusiya nümayəndə heyətinə prezident Vladimir Putinin köməkçisi Vladimir Medinski başçılıq edəcək. O, artıq 2022-ci ildə danışıqlar qrupuna rəhbərlik edib.
Nümayəndə heyətinə xarici işlər nazirinin müavini Mixail Qaluzin, Rusiya Baş Qərargahı Baş İdarəsinin rəisi İqor Kostyukov və müdafiə nazirinin müavini Aleksandr Fomin daxildir.
Bundan əvvəl Ukrayna prezidenti Volodimir Zelenski danışıqlarda Putinin iştirakını tələb edib. O, əks halda danışıqların baş tutmayacağını bildirsə də, sonradan bu mövqe yumşaldılıb.
'Mən yoxamsa, niyə getsin?' - Tramp Putinin İstanbula gəlməməsini dəyərləndirib
AFP xəbər verir ki, ABŞ prezidenti Donald Tramp Rusiya və Ukrayna arasında birbaşa sülh danışıqlarında irəliləyiş olarsa, mayın 16-da İstanbula uça biləcəyini deyib.
"Bilirsiniz, əgər nəsə baş verərsə, mən cümə günü gedərdim", –Tramp bildirib.
Putinin Rusiya-Ukrayna danışıqlarında iştirakdan imtina etməsinin səbəbini şərh edərkən prezident Tramp bildirib ki, o özü olmadığı üçün Rusiya prezidenti də İstanbuldakı görüşə gəlməyib: "Əgər mən getmədimsə, o niyə getsin? Düşünmürdüm ki, mən olmasam, Putin gedə bilər".
Hazırda prezident Tramp Yaxın Şərq ölkələrinə səfərdədir və bu səfərin mayın 15-də Birləşmiş Ərəb Əmirliklərində başa çatması planlaşdırılır.
Daha əvvəl bildirilib ki, İstanbulda keçiriləcək danışıqlarda ABŞ-ni dövlət katibi Marko Rubio və prezidentin xüsusi nümayəndəsi Stiv Uitkoff təmsil edəcək.
