Azərbaycan prezidenti İlham Əliyev və Ermənistan baş naziri Nikol Paşinyan Albaniyanın paytaxtı Tirana şəhərində Avropa Siyasi Birliyinin 6-cı Zirvə toplantısının açılış mərasimində görüşüblər. Görüşün, hələlik, detalları açıqlanmır.
Paşinyanın "Facebook" səhifəsində Əliyevlə görüşün səssiz videoyazısı yayılıb.
Son illər hər iki ölkə arasında həm Avropa İttifaqı, həm də Rusiyanın vasitəçiliyi ilə ayrı-ayrılıqda danışıqlar aparılsa da, hələlik, sülh sazişi imzalanmayıb.
Bununla belə, tərəflər bu il bəyan ediblər ki, sülh sazişi üzrə bütün müddəalar razılaşdırılıb. Amma Azərbaycan tərəfi bəyan edib ki, sülh sazişinin imzalanması üçün həm danışıqlara uzun illər vasitəçilik edən ATƏT-in Minsk qrupu buraxılmalıdır, həm də Ermənistan konstitusiyasına dəyişiklik edilməlidir. Rəsmi Bakının nöqteyi-nəzərincə, Ermənistan Konstitusiyasında Azərbaycana ərazi iddiaları var. Amma bununla Ermənistan tərəfi razı deyil.
Elə bu gün, mayın 16-da Azərbaycanın İctimai Televiziyasına müsahibə verən N.Paşinyan deyib ki, qonşu ölkələrə qarşı heç bir ərazi iddiaları yoxdur. Ermənistan tərəfi Minsk qrupunun buraxılması ilə bağlı təklifə isə hər hansı mənfi münasibət bəsləməyərək sülh sazişinin indidən imzalanmasını mümkün sayır.
Ermənistan baş nazirinin İTV-yə müsahibəsində vurğulamasına görə, onlar təklif edir ki, eyni vaxtda sülh müqaviləsi imzalansın və ATƏT-in Minsk qrupunun buraxılmasına dair müraciət olunsun.
N.Paşinyan həmçinin Azərbaycan Konstitusiyasında Ermənistana ərazi iddialarının olduğunu, amma bunu qaldırmadıqlarını vurğulayıb. Rəsmi Bakı isə bunu təkzib edir.
+++
Avropa İttifaqı (Aİ) Cənubi Qafqaz regionunu özünə daha da yaxınlaşdırmağa hazırdır. Bunu Aİ Şurasının prezidenti Antonio Koşta X sosial media hesabındakı paylaşımında bildirib: "Avropa Komissiyasının prezidenti Ursula Fon der Lyayen və mən Ermənistan və Azərbaycan liderlərini sülh müqaviləsinin yekunlaşdırılması münasibətilə təbrik etdik. Bu, irəliyə doğru böyük bir addımdır. Biz onun tezliklə imzalanmasını gözləyirik. Aİ regional əməkdaşlığa sərmayə qoymağa, bütün regionu bir-birinə və Birliyimizə daha da yaxınlaşdırmağa hazırdır".
Xatırlatma
Ötən əsrin 90-cı illərinin əvvəllərində Qarabağ münaqişəsi Azərbaycan və Ermənistan arasında toqquşmalar doğurmuş, Azərbaycanın Qarabağ bölgəsi və ətrafındakı 7 rayon işğal edilmişdi. 2020-ci il 44 günlük müharibə və 2023-cü ilin sentyabrında Qarabağdakı birgünlük hərbi əməliyyatlardan sonra Azərbaycan ərazi bütövlüyünü bərpa edib. Azərbaycan birgünlük əməliyyatı "antiterror tədbirləri", Yerevan isə "etnik təmizləmə" adlandırıb. Həmin əməliyyatdan sonra bölgənin erməni əhalisi Ermənistana köç edib.
