İsrail Qəzza zolağında HƏMAS-a (ABŞ və Aİ tərəfindən terror qruplaşması kimi tanınır) qarşı əməliyyatlarını "gücləndirmək və genişləndirmək" üçün on minlərlə ehtiyat əsgəri orduya çağırdığını açıqlayıb.
"Times of Israel" xəbər verir ki, mayın 4-ü gecə saatlarında İsrail Nazirlər Kabineti Qəzza zolağında HƏMAS-a qarşı hərbi hücumun genişləndirilməsi planını təsdiqləyib. Ancaq ordu baş komandanı nazirləri bu addımın orada saxlanılan girovları təhlükəyə ata biləcəyi barədə xəbərdar edib.
İsrail mediasının məlumatına görə, bu planın yalnız gələn həftə ABŞ prezidenti Donald Trampın regiona səfərindən sonra həyata keçirilməsi gözlənilir. Həmin vaxta qədər isə atəşkəs və girov razılaşması istiqamətində səylər davam edəcək.
Rəsmiyə görə, plana əsasən, İsrail silahlı qüvvələri (IDF) Qəzzadakı ərazilərə nəzarəti ələ alacaq, mülki əhalini cənuba doğru köçürəcək, HƏMAS-a hücum edəcək və onun humanitar yardıma nəzarətini əngəlləyəcək. İsrail iddia edir ki, HƏMAS imkanlarını gücləndirmək üçün humanitar yardımı özündə saxlayır.
Beynəlxalq vasitəçilərin iştirakı ilə aparılan danışıqlarda tərəflər HƏMAS-ın girovluğunda olan 59 israilli girovun azad edilməsi və atəşkəs barədə yeni razılaşmaya nail ola bilməyiblər. Eyni zamanda, yalnız 24 girovun sağ olduğu ehtimal edilir.
İki aylıq atəşkəsdən sonra martın 18-də İsrail HƏMASA qarşı müharibədə döyüşləri bərpa edib. O vaxtdan bəri heç bir israilli girov azad edilməyib. Həmçinin, Qəzza zolağının böyük əraziləri İsrailin nəzarətinə keçib və yüz minlərlə sakin bu əraziləri tərk edib.
Humanitar təşkilatlar IDF-nin təkrar hücumları fonunda ərazidə qida, su, dərman çatışmazlığı barədə xəbərdarlıq edib və İsrailin hərəkətlərini "aclıq siyasəti" olaraq qiymətləndirib. Bunun hərbi cinayətlə eyniləşdirilə biləcəyi barədə xəbərdarlıq olunub. BBC xəbər verir ki, İsrail bu ittihamları rədd edib.
İranın dəstək verdiyi Yəməndəki husilər isə IDF-nin Qəzza zolağında əməliyyatları dayandırmasını tələb edərək, mayın 4-də İsraili "hava blokadası" ilə hədələyiblər. Husilər İsrail hava limanlarına təkrar hücumlarla bu blokadanı həyata keçirmək niyyətində olduğunu açıqlayıb. Elə həmin gün husilərin atdığı raket İsrailin Ben-Qurion hava limanını hədəf alıb. Raket bazar günü səhər saatlarında əsas terminalın yaxınlığında düşüb. Altı nəfər yüngül xəsarət alıb. İsrail baş naziri Benyamin Netanyahu daha sonra bildirib ki, İsrail husilərə qarşı yeni zərbələr endirərək cavab tədbirləri görəcək.
İran dəstəklədiyi "Ənsar Allah" qruplaşması Yəmənin böyük bir hissəsinə nəzarət edir və ballistik raketlərə malikdir. ABŞ tərəfindən terrorçu kimi tanın bu qruplaşma 2023-cü ilin payızında IDF-nin Qəzza zolağında əməliyyatlarına başladığı vaxtdan etibarən, dəfələrlə İsrailin ərazisinə raketlər atıb. Husilər həmçinin Ərəbistan körfəzində və Qırmızı dənizdə İsrail və onun müttəfiqləri ilə əlaqəli olduğunu ehtimal etdikləri gəmiləri atəşə tuturlar. İsrail, öz növbəsində, Yəməndəki husilərə aid hədəflərə zərbələr endirib, eyni zamanda, ABŞ da bu qruplaşmanı bir neçə dəfə hədəf alıb.
