Şimali Koreya Rusiyaya təxminən 15 min əmək miqrant göndərib. Bu barədə "The Wall Street Journal" və "Reuters" Cənubi Koreya kəşfiyyatına istinadən yazıb.
Rusiyanın statistika məlumatlarına əsasən, 2024-cü ildə ölkəyə daxil olan şimali koreyalıların sayı əvvəlki illə müqayisədə 12 dəfə artıb.
Şimali Koreya vətəndaşlarının böyük əksəriyyəti hazırda Uzaq Şərqdə çalışır. Rusiyada ümid edirlər ki, şimali koreyalı işçilər tezliklə ölkənin digər bölgələrindəki böyük şəhərlərdə də işləməyə başlayacaqlar. Qeyd olunur ki, yerli işəgötürənlər Koreya Xalq Demokratik Respublikasından (KXDR) olan işçiləri aşağı maaşa razı olduqları, gündə 12 saat işlədikləri və iş şəraitindən şikayət etmədikləri üçün yüksək qiymətləndirir.
Fevralın əvvəlində Cənubu Koreyanın "Yonhap" xəbər agentliyi də kəşfiyyat məlumatlarına istinadən yazmışdı ki, Pxenyan işçi qüvvəsi çatışmazlığı fonunda Rusiyaya minlərlə işçi göndərib. Rusiya Əmək Nazirliyinin məlumatına görə, 2030-cu ilə qədər ölkədə işçi qüvvəsi çatışmazlığı hazırkı 1.5 milyon nəfərdən 2.4 milyon nəfərə yüksələ bilər.
Şimali koreyalıların bir çoxu Rusiyaya tələbə vizası ilə daxil olub. "Vajnıye istorii" nəşri Rusiya Federal Təhlükəsizlik Xidmətinin (FSB) Sərhəd Xidmətinə istinadən yazıb ki, 2024-cü ildə Rusiyaya təhsil almaq məqsədilə 7.8 min şimali koreyalı gəlib. Bu, 2019-cu ildən bəri ən yüksək göstəricidir. "Mediazona" isə qeyd edib ki, Şimali Koreyadan olan tələbələrin sayı 2024-cü ilin üçüncü rübündə artmağa başlayıb. Halbuki, elə həmin ilin aprelində Rusiya Elm və Təhsil Nazirliyi bildirib ki, o dövrdə ölkədə KXDR-dən cəmi 130 tələbə təhsil alır.
BMT Təhlükəsizlik Şurasının qərarına əsasən, Şimali Koreya vətəndaşlarının işə götürülməsi qadağandır. Bu sanksiyalar Pxenyanın nüvə proqramının maliyyələşdirilməsinin qarşısını almağa yönəlib.
Şimali Koreya yalnız işçiləri deyil, həm də hərbçilərini və silahlarını Rusiyaya göndərir. Cənubi Koreya kəşfiyyatının məlumatına görə, 2024-cü ildə Ukraynaya qarşı müharibədə iştirak üçün Rusiyaya 12 min şimali koreyalı hərbçi göndərilib, 2025-ci ildə isə bu saya daha 3 min nəfər əlavə olunub. KXDR-in itkiləri təxminən 4 min 700 nəfər təşkil edib, onlardan 600-ü ölüb.
