ToplumTV-nin təsisçisi, media hüququ eksperti Ələsgər Məmmədli deyir ki, evində axtarış aparılarkən uşaqlarının doğum günlərinə aid disklər, ailə albomları, özünün 30 illik fəaliyyətinə aid arxivi də götürülüb və indiyədək heç biri qaytarılmayıb. "11 gündür ki, həbs müddətimiz bitib, faktik məhkəmə qərarı və hüquqi əsas olmadan həbsdə saxlanılırıq. Bu, insanlıqdır? Bu, hüquqdur?", - o, mayın 5-də Bakı Ağır Cinayətlər Məhkəməsindəki çıxışında belə deyib.
Ə.Məmmədli ötən il martın 8-də mənzilində axtarış aparılarkən götürülmüş avadanlıqların geri qaytarılmasını, avtomobilinin üzərindən həbsin götürülməsini istəyib və bu avtomobilin ailəsinin ortaq mülkiyyəti olduğunu vurğulayıb. O, heç bir əsas olmadan avtomobilinə həbs qoyulmasını mülkiyyət hüququnun pozulması adlandırıb.
ToplumTV ilə bağlı cinayət işi üzrə Ə.Məmmədli ilə yanaşı, daha 7 nəfər - III Respublika Platformasının spikeri Akif Qurbanov, Platformanın üzvü Ruslan İzzətli, Demokratik Təşəbbüslər İnstitutunun əməkdaşları Ramil Babayev, İlkin Əmrahov, Əli Zeynal, ToplumTV-nin jurnalisti Fərid İsmayılov və videoredaktoru Müşfiq Cabbar həbsdədir. Daha bir nəfərin - Elmir Abbasovun haqqında da alternativ qətimkan tədbiri seçilib.
A.Qurbanov da tutulduğu gün ailəsinə, uşaqlarına məxsus telefon və kompüterlərin götürüldüyünü və bugünədək qaytarılmadığını bildirib. O, hətta atasının avtomobilindən, valideynlərinin evindən götürülmüş kompüterlərin də ofisdən götürülmüş kimi rəsmiləşdirildiyini söyləyib.
Vəkillər müvəkkilləri haqqında həbs-qətimkan tədbirinin uzadılmaması, onların evlərindən götürülmüş əşyaların qaytarılması barədə vəsatətlər qaldırıblar.
"Avropada ən çox həbs qərarları verilən ölkələr arasındayıq"
A.Qurbanovun vəkili Fuad Ağayev Avropa Məhkəməsinin Azərbaycana qarşı çıxardığı qərarları yada salaraq vurğulayıb ki, şəxsin həbsdə saxlanması haqda qərar qəlib ifadələrlə əsaslandırılmamalı və bu adamın həbsdə qalmasının niyə zəruri olduğu göstərilməlidir.
F.Ağayev də A.Qurbanovun övladlarının dərslərdə yararlandığı kompüterlərin, içində ailə fotoları olan telefonların indiyədək qaytarılmadığını mülkiyyət hüququnun pozulması kimi dəyərləndirib.
Ə.Məmmədlinin vəkili Fəxrəddin Mehdiyev müvəkkilinin sağlamlığındakı problemlərə diqqət çəkib: "Həbs olunanlar cəmiyyətin qiymətli adamlarıdır. Həbs-qətimkan tədbiri müstəsna hallarda tətbiq oluna bilər. Bunun üçün maddi prosessual əsaslar olmalıdır. Bizdə buna əhəmiyyət verilməməyinin nəticəsidir ki, Avropada ən çox həbs qərarları verilən ölkələr arasındayıq".
Təqsirləndirilən şəxslərdən A.Qurbanov təklif edib ki, heç olmasa, gəncləri həbsdən buraxsınlar: "Hakimiyyətə girovluqda adam lazımdırsa, içəridə məni saxlasın. Ruslan İzzətli və Ələsgər Məmmədli bizdən iki gün sonra həbs olundu. Yəqin düşündülər ki, onlar qalsa, davam edə bilərlər. Bunu başa düşdük. Bu gənclər çıxsa, neyləyəcək? Buraxın, çıxsınlar...".
Hakimlər vəsatətlərin heç birini təmin etməyiblər. Məhkəmə prosesinə sədrlik edən hakim Azər Tağıyev ailələrə məxsus əşyalarla bağlı durumu nəzarətinə götürüb araşdıracağını bildirib.
Məhkəmə prosesi mayın 19-da davam edəcək.
Xatırlatma
ToplumTV işi üzrə həbslər ötən ilin martından başlanıb. O vaxt bu işlə bağlı 7 nəfər qaçaqmalçılıq ittihamıyla həbs olunsa da, Fərid İsmayılovla Elmir Abbasov haqqında alternativ qətimkan tədbiri seçilmişdi. Ancaq F.İsmayılov 2025-ci ilin yanvarında həbs edilib.
Fevralda həmin işlə bağlı jurnalist Şahnaz Bəylərqızı da həbs olunsa da, elə həmin ayın sonunda ev dustaqlığına buraxılıb.
ToplumTV işi üzrə təqsirləndirilənlərə istintaqın sonunda qaçaqmalçılıqla yanaşı, cinayət yolu ilə əldə edilmiş külli miqdarda əmlakı leqallaşdırma, qanunsuz sahibkarlıq, vergidən yayınma, əmək müqaviləsi olmadan işçiləri cəlb etmə və başqa ittihamlar da elan edilib. Onların suçlandığı maddələrdə 12 ilədək həbs cəzası nəzərdə tutulub.
Təqsirləndirilənlərin heç biri ittihamları qəbul etmir, peşə fəaliyyətlərinə görə siyasi sifarişlə həbs olunduqlarını deyirlər.
2023-cü ilin noyabrından başlayaraq Azərbaycanda qruplar halında 30 nəfərdən çox jurnalist, ictimai fəal qaçaqmalçılıq ittihamı ilə həbs edilib.
Yerli hüquq-müdafiə təşkilatlarının hazırladığı siyahılara görə, hazırda Azərbaycan həbsxanalarında təxminən 350 siyasi məhbus var.
Rəsmilər, bir qayda olaraq, vurğulayırlar ki, ölkədə heç kim sırf peşə fəaliyyəti ilə bağlı, siyasi əsaslarla həbs edilmir. Onların iddiasına görə, həmin siyahılarda adları keçənlər sırf törətdikləri əməllər üzündən məsuliyyətə cəlb ediliblər.
